【#大灣地圖🗺️ · 科創篇】

講起 #大灣區 內地城市，總會提到 #科創 行業蓬勃發展。不過，個個地方都搞科創，咁咪得個爭字？ 🧐

其實，幾個城市都各有自己嘅 #優勢領域 㗎，譬如：

› #深圳 電子信息同互聯網產業強勁，企業中嘅表表者有大疆、騰訊同華為等等
› #東莞 呢個製造業基地，吸引咗OPPO、vivo等等智能手機大牌落戶
› #惠州 嘅傳統產業包括石油化工，所以規劃成為廣東省嘅能源基地，例如中海殼牌就位於嗰度

而有啲行業，雖然唔止一個城市發展緊，但其實都有所分工：

例如喺生物醫藥方面，廣州深圳各有所長——廣州開發區有超過1,000間生物醫藥企業，而深圳就主要發展DNA測序技術，有華大基因等龍頭企業，亦都有全國唯一一間基因庫。

喺唔同嘅領域上細緻咁分工同互補，就可以避免城市之間 #同質發展 造成惡性競爭，做到互惠互利喇！

睇返香港，我哋嘅優勢就係咁多間大學同研究機構嘅上游基礎研究。例如，港大同廣東藥科大學成立咗創新平台，而科大、理大都有同華為合作研究5G技術，backup咗唔同科創領域嘅發展～

再進一步睇嘅話，香港亦可以借住大灣區科創發展呢陣東風，完善我哋嘅科研生態，除咗理論化啲嘅基礎研究，亦可以推動埋應用研究，將理論化為實際嘅技術 💡