【轉發】【居大不易 要靠居二？】 | 政策．正察

【居大不易 要靠居二？】

唐代詩人白居易盛名不朽，筆下嘅《長恨歌》、《琵琶行》流傳至今依然膾炙人口。好多人都知，白居易在生時已畀人用個名去搞「食字gag」，另一詩人顧況見其名字之後就話︰「長安百物貴，居大不易。」。而千幾年之後嘅今日，另一國際城市香港同樣面對「住得細、居大不易」嘅問題。呢個時候，又要請多次大詩人出嚟，用佢個名搞多次食字gag啦！

正所謂「青年置業上流 要靠白居二打救」，「白居二」全名係白表居屋第二市場計劃，即係居屋業主可以喺未有補價嘅情況之下，將單位轉售於合資格、由房委會提名嘅人士。

咁你可能會問，目前都有「白居二」，點解仲要佢打救？問題關鍵就在於「按揭擔保期」啦。目前，政府為居屋設有30年擔保期，期內買家可以無需接受壓力測試、審查收入證明文件下借取九成按揭。不過，當剩餘擔保期降至5年以內，銀行會漸漸收緊按揭年期、成數上；一旦擔保期結束，一般只能借取六成按揭，首期金額同時大大增加。

以價值同為五百萬、但樓齡不同嘅居屋為例，首期就可以爭成150萬咁多︰
1️⃣樓齡較新居屋︰喺借取樓價90%嘅按揭貸款之下，需付首期為50萬
2️⃣樓齡較舊、擔保期已完結居屋︰按揭成數不得多於樓價60%，需付首期為200萬

利用「白居二」置業係唔少年輕人嘅夢想，但因應目前有成65%二手居屋(約21萬伙)嘅居屋不符合承造九成按揭嘅條件，令上車嘅機會大大增加。如果要善用「白居二」去幫助青年置業，又可以點做？

#上車 #置業 #買樓 #上流 #青年 #白居二 #白居易 #居屋

【延伸閱讀】
幾多二手居屋「唔受保」？ https://bit.ly/3LpmTuH
按揭擔保期同上車關係詳解 https://bit.ly/3Mktl7j
研究報告．青年置業與社會流動性研究 https://bit.ly/2D31TGA

Source by 政策．正察